Shillong, Jan 2: South West Garo Hills a·jani Deputy Commissioner Anendya Raajsshre, jatska jatgipin baksa tom·tomaniko rakkichina, District Administration baksa bakrimchina aro niam bidikni kamko an·tang jako ra·e kam ka·pajachina a·jao songdongenggipa sakantikon mol·molataha.
Sombar salo, tom·tomaniko a·jao rakkiani gimin chanchirimna gita South West Garo Hills Administration tom·bimonganiko ong·ataha aro ia tom·anio, Garo Hills a·jao jatgnini gisepo so·sojengjeng ong·ani a·sel guerangko badingchiwalna man·jaengani gimin chanchirimangaha aro iano Nokma Council, toromko dilgiparang, songsalna kam ka·gipa dolrang, a·gipbi manderang, market committee, gue bagan dakenggiparang aro badingchiwalaniko dakenggipa dolrang bak ra·angaha.
Tom·anio Raajsshre jinmana aganengon, West Garo Hills a·ja aro Assam a·dokni South Salmara a·ja baksa bakrime kam ka·ani gimin tom·e chanchirimaniko dakengkuani gimin, pilak bading chiwalaniko dakenggipa aro songdong a·chaenggipa manderangko sengnapkuchina ua mol·molataha.
Superintendent of Police Vikash Varma-ba, sakantian tom·tomaniko rakkichina, social media-rango kakketgipa koborrangkosan bebe ra·china aro maiba a·selrang ong·aniko nikgenchimode sepangbatgipa Police Station-ona koborko on·china mol·molataha.
Batanggimin somoio Rajabala-ni ning·o donggipa Goalgaon songo a·sel ong·anichi, jatgnini gisepo so·sojengjeng ong·enganiko nikna man·enga aro iani gisepon, jatgnini gisepo tom·tomaniko rakkichina, tom·tomani tom·bimonganirangko ong·ataha.
A·dokni jakgitelaniko man·a skang ia a·jarango jatgnini gisepo meli nangrime songdong a·chabaaha aro iani gisepon, mingsa a·sel ong·anichi so·sojengjeng ong·aniko nikna man·aha.
Source link
#SWGHo #tomtomaniko #rakkichina #molmola #Hub #Information
